هم المختلين عقليا اللي هيجيبوا مصر لورا.. هم اللي بيعملوا القلاقل و الاضطرابات و يثيروا الشغب بين فئات الشعب الآمن...
خد عندك مثلا الواد المخبول بتاع بني مزار اللي مرضه العقلي خلاه ينفع يشتغل أجدعها جراح
ولا الواد العبيط االلي كان فرحان بالسكينة الجديدة اللي معاه و كاان بيجربها بس فجت في الراهبة سارة قدام الكنيسة..
ولا الراكب الأهبل اللي كان عامل دماغ و صمم يولع الباجور يسخن عليه حلة المحشي في العبارة مع أن ممدوح باشا اسماعيل شخصيا اتصل بيه يترجاه مايعملهاش .. و كانت النتيجة غرق آلاف ملهاش ذنب إلا طفاسته و هبالته
عمل بالظبط زي الراكب العبيط بتاع قطر الصعيد .. بس التانية بقي كانت حلة مسقعة..
و أخيرا و ليس آخرا الواد بتاع اسكندرية مختل عقليا .. و عبيط و بريالة .. و مرضه ده يا حول الله خلاه واد متحرك ينط من كنيسة لكنيسة و يركب المترو و هو مش دريان بعيشته
ربنا يشفيه و يشفي كل مريض ...لحسن بجد دول كتروا قوي و كده خطر علي البلد و أمن البلد
ربنا يخليه لنا حبيب العدلي حبيب الشعب و..... عجبي ..

طول عمري وانا مش من أنصار نظرية المؤامرة و طول عمري-مع احترامي للجميع - وانا بقول ان دي طريقة ساذجة وسطحية لتحليل الأمور و بتعكس نوع من أنواع البارانويا العربية الشهيرة
و بالتالي انا بتعجب و بشدة من الناس اللي طلعت تألف وتحلل وتفتي وتقول وتعيد وتزيد في الموضوع مع بعض البهارات المتبلة التي تشتهر بها المنطقة العربية و فجأة أصبح الموضوع كالآتي : احنا مسلمين غلابة طيبين وهم كفرة فسقة وفجار احنا حلوين وأمامير وهم وحشين وشريرين وطرف من أطراف مؤامرة كبري علي الأسلام والمسلمين بدأها الشيطان الأعظم بوش بحربه الصليبية علي العراق وأفغانستان ..وحتماولابد وقطعا مسابقة الكاريكاتير دي حصلت بتمويل يهودي وبدعم من الموساد
وفجأة لقيت المسجات بتنهال علي الموبايل والايميلات للدعوة علي الدنماركيين الكفرة وان ييتم أطفالهم ويشرد نساءهم
والاحصائيات الدقيقة_اللي مش عارفة جابوها منين_ اللي بتاكد كام مليار يورو بالضبط هيخسرو الاقتصاد الدنماركي وفرحانين بشكل !!
لا وايه كمان
امبارح بالذات قبل ماتش مصر في رسالة انتشرت علي الموبايلات اننا نكتب شعرات معادية للدنمارك علي الأعلام اللي هنشيلها في الاستاد !!!!!!!!!!!!!!!!! ومحددين كمان "في الجزء الأبيض من العلم وبحروف انجليزية واضحة واستخدم الحبر الأسود "!!!!!!!!!!!!!!!!!!!!!!!1 !!
ايه يا جماعة؟؟
ايه اللي حصلنا؟؟
ليه بقينا عدائيين كده؟ ليه بنصر دايما اننا نأكد للعالم مدي تخلفنا و عدم فهمنا لحاجة في أي حاجة .. العالم كله دلوقت بيعامل معانا بمنطق الأطفال .. بلاش يثيرونا احسن ممكن نعمل تصرف مش مسئول ..زي حرق السفارات مثلا !! المصيبة ان في ناس فرحانة جدا بحرق السفارات و ناس فرحانة اكتر بخسارة الاقتصلاد الدنماركي زي مايكون العدائية و حب الانتقام والعشوائية صفات متأصلة في وجدان كل عربي .. حد هيقولي هم اللي بدأو بالاعتداء .. "هم" مين يا جماعة؟؟؟ كام رسام في صحيفة؟؟ تقوموا تجازوا شعب بأكمله ودولة بكاملها ؟ فين العقل؟ فين المنطق؟؟ فكرتوني بمدرس عربي ودين كنت باكرهه في ابتدائي ولما كبرت عرفت كنت بكرهه ليه .. كان لو في حد في الفصل اتكلم ..حد واحد بس .. كان يوقف الفصل كله طول الحصة ويضربنا كلنا بالخرزانة مرة واتنين وتلاتة.. كنت ببصله وهو بيضربنا ..كنت بحب اشوف تعبيرات وشه ..كنت بلاقيه فرحان وعلي وشه ابتسامة تشفي رهيبة ...اكيد كنت بكرهه ساعتها علشان الألم من الضرب لكن لما كبرت عرفت اته كان سيكوباتي شخصية مريضة .. بيستمتع بتعذيب الناس
اللي حصل يا جماعة خلاني اسأل سؤال في منتهي الخطورة ..هل احنا سيكوباتيين؟ ولا مجرد مش فاهمين حاجة في اي حاجة؟
ايه اللي احنا عاوزينه ..؟اللي سسفته بيأكد ان احنا عندنا طاقة تدميرية وعدائية عالية جدا ... ليه؟
الرسول صلي الله عليه وسلم أعلي وأسمي وأشرف من أن تتأثر شخصيته الكريمة برسوم كاريكاتورية تافهة اتنشرت في
صحيفة في دولة مش باينة علي الخريطة
هل الرسومات دي انتقصت من قدره شيء؟ بالطبع لا !!!!!!!!!!!!!!!!
ردنا علي اللي حصل بالعنف والعشوائية هو اللي اساء لصورة نبينا الكريم وديننا في عيونهم ..
اللي حصل أثبت ان احنا شوية ناس مابتفكرش ..اللغة الوحيدة اللي يفهموها هي العنف

انا طولت كتير في انتقادي لنظرية المؤامرة اللي بتقول ان اللي حصل بتمويل يهودي ز..الخ
لكن من المهم كمان اني انتقد نظرية مؤامرة تانية من نوع تاني بتقول ان السبب في الموضوع ده كله رجال اعمال سعوديين !!علشان يروجوا سلعهم في الخليج !!!!!!!!!!!!!!!!!!!!!!!!
ليـــــــــــــــــــــه يا جماعة؟ ليه لازم نفسر اي حاجة علي انها مؤامرة؟ ليه لازم يكون في حد بيتآمر؟ حد بينصب علينا؟
هل ده انعدام ثقة في النفس مثلا ان احنا شايفين نفسنا نستاهل يتضحك علينا ولا ايه؟
يا جماعة ارحموا نفسكوا شوية وارحمووووووني